திருக்குறள்

வாழ்க்கைத் துணைநலம்

இல்வாழ்கையில் பெண்ணின் அறநெறிகள் பற்றியும், குணநலன்கள் பற்றியும் தெளிவாக தமது ஆறாவது “வாழ்க்கைத் துணைநலம்” அதிகாரத்தில் கூறியுள்ளார்.

51. மனைத்தக்க மாண்புடையள் ஆகித்தற் கொண்டான்

      வளத்தக்காள் வாழ்க்கைத் துணை

பொருள் : பிறந்த, புகுந்த குடும்பங்களுக்கு ஏற்ற நல்ல குணம், நல்ல செயல்களை உடையவளாய்த், தன்னை மணந்தவனின் வருவாய்க்கு ஏற்ப வாழ்க்கையை அமைப்பவளே மனைவி.

52. மனைமாட்சி இல்லாள்கண் இல்லாயின் வாழ்க்கை

      எனைமாட்சித் தாயினும் இல்

பொருள் : இல்வாழ்க்கைக்கு தக்க நற்பண்பு மனைவியிடம் இல்லையானால், ஒருவனுடைய வாழ்க்கை வேறு எவ்வளவு சிறப்புடையதானாலும் பயன் இல்லை.

53. இல்லதென் இல்லவள் மாண்பானால் உள்ளதென்

      இல்லவள் மாணாக் கடை

பொருள் : நல்ல குணமும் நல்ல செயல்களும் உடையவனாய் மனைவி அமைந்துவிட்டால் ஒருவனுக்கு இல்லாததுதான் என்ன? அமையாவிட்டால் அவனிடம் இருப்பதுதான் என்ன?.

54. பெண்ணின் பெருந்தக்க யாவுள கற்பென்னும்

      திண்மைஉண் டாகப் பெறின்

பொருள் : கற்பு எனப்படும் மன உறுதி மட்டும் பெண்ணிடம் இருக்குமானால் மனைவியைக் காட்டிலும் மேலானவை எவை?.

55. தெய்வம் தொழாஅள் கொழுநற் றொழுதெழுவாள்

      பெய்யெனப் பெய்யும் மழை

பொருள் : பிற தெய்வங்களைத் தொழாமல் கணவனையே தெய்வமாகத் தொழுது வாழும் மனைவி, பெய் என்று சொன்னால் மழை பெய்யும்.

56. தற்காத்துத் தற்கொண்டாற் பேணித் தகைசான்ற

      சொற்காத்துச் சோர்விலாள் பெண்

பொருள் : கற்பு நெறியில் தன்னையும் காத்துக்கொண்டு, தன்கணவனையும் காப்பாற்றி, தகுதியமைந்த புகழையும் காத்து உறுதி தளராமல் வாழ்கின்றவளே பெண்.

57. சிறைகாக்கும் காப்பெவன் செய்யும் மகளிர்

      நிறைகாக்கும் காப்பே தலை

பொருள் : தம்மைத் தாமே காத்துக்கொண்டு சிறந்த பண்புடன் வாழும் மகளிரை அடிமைகளாக நடத்த எண்ணுவது அறியாமையாகும்.

58. பெற்றாற் பெறின்பெறுவர் பெண்டிர் பெருஞ்சிறப்புப்

      புத்தேளிர் வாழும் உலகு

பொருள் : கணவனைப் போற்றிக் கடமையைச் செய்யப்பெற்றால் மகளிர் பெரிய சிறப்பை உடைய மேலுலகவாழ்வைப் பெறுவர்.

59. புகழ்புரிந் தில்லிலோர்க் கில்லை இகழ்வார்முன்

      ஏறுபோல் பீடு நடை

பொருள் : புகழுக்குரிய இல்வாழ்க்கை அமையாதவர்கள், தம்மைப் பழித்துப் பேசுவோர் முன்பு தலைநிமிர்ந்து நடக்க முடியாமல் குன்றிப் போய் விடுவார்கள்.

60. மங்கலம் என்ப மனைமாட்சி மற்றதன்

      நன்கலம் நன்மக்கட் பேறு

பொருள் : மனைவியுடன் வாழும் வாழ்க்கையைச் சிறப்பாக வாழ்பவன், பூமியில் வாழ்ந்தாலும், வானத்துள் வாழும் தேவருள் ஒருவனாகவே மதிக்கப்படுவான்.